Этноауыл аумағында аударыспақтан жарыстар өз мәресіне жетті. Екі күнге созылған жарыстардың нәтижесінде Қазақстан құрамасы барлық салмақ дәрежелері бойынша 5 алтын және 1 күміс медаль еншіледі.
Аударыспақшылар үш салмақ дәрежесі бойынша сынға түсті: 90, 100 және 100 кг-нан жоғары. Қазақстандық спортшылар жоғары дайындықтарын көрсетіп, 100 және 100 кг-нан жоғары салмақ дәрежелерінде алтын медальға ие болды, ал 90 кг салмақ дәрежесінде күміс медальды қанжығасына байлады.
Марат Жұман, Халықаралық ат үсті күресі федерациясының және Қазақстан аударыспақ федерациясының президенті: «Мен біздің спортшыларымызбен өте мақтанамын. Олар нағыз жауынгерлер. Ат үстінде жеңіске жету үшін мықты балуан ғана емес, сонымен қатар шебер шабандоз болу керек. Біздің ата-бабаларымыз сияқты батыл және епті болу қажет.
Ат үсті күресі федерациясының президенті ретінде барлық спортшылардың жоғары деңгейде дайындалғанын атап өткім келеді. Көшпенділердің дүниежүзілік ойындары сияқты жарыстардың арқасында ұлттық спорт түрлеріміз жастар арасында кеңінен танымал болып жатқанына қуаныштымын», – деді.
Ат үстіндегі күреске 9 елден 40 спортшы қатысты. Қазақстан, Қырғызстан, Моңғолия, Ресей, Өзбекстан, Қытай, Түркия, АҚШ және Венгрия спортшылары өзара бақ сынасты.
